Shukriya, Shukriya Aap Ki Inayat Ka
Gham Ki Daulat Mujhe Ata Kar Di

Aap Ne Hans Hans Ke Ibtida Ki Thi
Main Ne Ro Ro Ke Intiha Kar Di

Chaandni Chaand Se Hoti Hai, Sitaron Se Nahi
Aur Dosti Ek Se Hoti Hai, Hazaron Se Nahi

Bewafaa…
Bewafa Yoon Tera Muskurana
Bhool Jaane Ke Qaabil Nahi Hai
Bhool Jaane Ke Qaabil Nahi Hai
Bhool Jaane Ke Qaabil Nahi Hai

Woh Jo Hum Mein Tum Mein Qaraar Tha
Tumhein Yaad Ho Ke Na Yaad Ho
Wohi Yaani Waada Nibah Ka
Tumhein Yaad Ho Ke Na Yaad Ho

Woh Jo Lutf Mujh Pe The Beshtar
Woh Karam Ke Tha Mere Haal Par
Mujhe Sab Hai Yaad Zara Zara
Tumhein Yaad Ho Ke Na Yaad Ho

Woh Naye Gile Woh Shikayatein
Woh Mazay Mazay Ki Hikayatein
Woh Har Ek Baat Pe Roothna
Tumhein Yaad Ho Ke Na Yaad Ho

Kabhi Hum Mein Tum Mein Bhi Chah Thi
Kabhi Hum Se Tum Se Bhi Raah Thi
Kabhi Hum Bhi Tum Bhi The Aashna
Tumhein Yaad Ho Ke Na Yaad Ho

Jise Aap Ginte The Aashna
Jise Aap Kehte The Ba-Wafa
Main Wohi Hoon “Momin”-e-Mubtala
Tumhein Yaad Ho Ke Na Yaad Ho

Bewafa Yoon Tera Muskurana
Bhool Jaane Ke Qaabil Nahi Hai

Hans Hans Ke Kabhi Chal Chal Dena
Ruk Ruk Ke Kabhi Murh Murh Jana
Bhool Jaane Ke Qaabil Nahi Hai

Din Bhar Woh Zara Si Aahat Par
Chilman Ke Qareeb Aana Jaana
Bhool Jaane Ke Qaabil Nahi Hai

Tanhai Mile To Ro Lena
Tanhai Na Ho To Ghabrana
Bhool Jaane Ke Qaabil Nahi Hai

Aansu Jo Nikalne Par Aayein
Ghabra Ke Woh Aankhein Mal Dena
Bhool Jaane Ke Qaabil Nahi Hai

Ek Gali Se Roz Guzarna
Bhool Jaane Ke Qaabil Nahi Hai

Chunri Ke Mulaim Kone Ko
Daanton Mein Daba Kar Bal Dena
Bhool Jaane Ke Qaabil Nahi Hai

Woh Tapti Dopahrein, Garm Chhatein
Kothay Pe Woh Pheron Par Phere
Bhool Jaane Ke Qaabil Nahi Hai

Nikle The Munh Chhupaye Hue Ghar Se Ghair Ke
Tasveer Ban Gaye Jo Mera Saamna Hua
Bhool Jaane Ke Qaabil Nahi Hai

Mere Dushman Ko Mere Sar Ki Qasam Dete Hain
Bhool Jaane Ke Qaabil Nahi Hai

Woh Mere Saamne Baitha Tha Ghair Ko Le Kar
Bhool Jaane Ke Qaabil Nahi Hai

Itne Sadme Uthaye Hain Maine
Sar Uthane Ke Qaabil Nahi Hai

Ek Din Baithe Baithe Yeh Junoon Mujhko Hua
Ke Main Apne Dar Se Nikla Unke Dar Par Ja Laga
Ho Rahi Thi Raaz Ki Baatein Main Sab Sunta Raha
Koi Aashiq Unke Qadmon Par Yeh Keh Raha

Aaj Ki Shab Kahan Par Guzaari
Maine Pocha To Jhunjhla Ke Bole
Baat Tum Aisi Kyun Poochte Ho
Jo Batane Ke Qaabil Nahi Hai

Nikala Teer Seene Se Ke Jaane-Pur-Alam Nikle
Jo Yeh Nikle To Dil Nikle
Jo Dil Nikle To Dum Nikle
Jigar Ko Thaam Ke Hum Nikle

Yeh Arzoo Thi Ke Qadmon Pe Tere Dum Nikle
Qusoor Tera Nahi, Kam Naseeb Hum Nikle

To Kya Karoon Main Muqaddar Ka Shikwa
Sun Ke Aashiq Ki Apne Woh Keh De
Aisi Taqdeer Kyun Leke Aaye
Jo Banane Ke Qaabil Nahi Hai

Dekho Talwar Tum Na Uthao
Jo Main Kehta Hoon Woh Maan Jao
Janta hoon yeh Nazuk Kalai Hai
Bojh Uthane Ke Qaabil Nahi Hai

Maine Khat Likh Ke Unko Bulaya
Jawab Aaya Ke Aana Na Mumkin
Unke Paon Mein Mehndi Lagi Hai
Aane Jaane Ke Qaabil Nahi Hain

Aye Bewafaa Tera Yoon Muskurana
Bhool Jaane Ke Qaabil Nahi Hai